ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន សូមជម្រាបជូនសាធារណជនមេត្តាជ្រាបថា រាជរដ្ឋាភិបាលកម្ពុជា បានចេញវិធានការជួយសំរួលដល់ជនបរទេសមួយចំនួន ដែលបានទៅដល់ប្រទេសកម្ពុជា ចាប់ពីថ្ងៃទី០១ ខែមករា ឆ្នាំ២០២០ ហើយមិនអាចវិលត្រលប់ទៅប្រទេសខ្លួនវិញបាន ដោយសារការរឹតត្បិតជើងហោះហើរ បន្ទាប់ពីការរីករាលដាលវីរុសកូវីដ១៩។ នៅក្នុងន័យនេះ រាជរដ្ឋាភិបាលកម្ពុជា បានសម្រេចពន្យារទិដ្ឋាការទេសចរណ៍ប្រភេទ T ជូនអ្នកទាំងនោះ រហូតដល់ពួគគាត់អាច ចាកចេញពីប្រទេសកម្ពុជាបាន ហើយលើកលែងមិនយកប្រាក់ពិន័យចំពោះការស្នាក់នៅហួសកាលកំណត់ទិដ្ឋាការ ។ វិធានការនេះមានប្រសិទ្ធភាព ចាប់ពីថ្ងៃទី០៣ ខែមេសា ឆ្នាំ២០២០។

ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន សូមជម្រាបជូនយុវជនយុវនារី និស្សិត និងសិស្សានុសិស្សទាំងអស់ ទាំងនៅក្នុង និងក្រៅប្រទេសមេត្តាជ្រាបថា មូលនិធី Goi Peace Foundation នឹងរៀបចំការប្រលងសំណេរអត្ថបទអន្តរជាតិសំរាប់យុវជន ឆ្នាំ ២០២០ (2020 International Essay Contest for Young People) ក្រោមប្រធានបទ “A Letter from Myself in 2030” ដូចមានឯកសារជូនភ្ជាប់ ។ ស្ថានទូតសូមលើកទឹកចិត្ត យុវជនយុវនារី និស្សិត និងសិស្សានុសិស្សទាំងអស់ចូលរួមការប្រលងនេះអោយបានច្រើន ព្រោះនេះជាឪកាសសំរាប់បង្ហាញសមត្ថភាព និងធ្វើអោយប្រទេសយើងកាន់តែល្បីលើឆាកអន្តរជាតិ ។ សូមជូនពរទទួលបានជោគជ័យ ។

សេចក្តីជូនដំណឹងអំពីវិធានការរបស់រដ្ឋាភិបាលជប៉ុនក្នុងការផ្អាកទិដ្ឋាការចូលប្រទេសជប៉ុន នៅទូទាំងពិភពលោក (រួមទាំងកម្ពុជា) ជាបណ្ដោះអាសន្ន ដើម្បីទប់ស្កាត់ការរីករាលដាលនៃកូវីដ១៩ ហើយការផ្អាកនេះបានចូលជាធរមាននៅម៉ោង ០០:០០ ថ្ងៃទី០៣ ខែមេសា ឆ្នាំ២០២០។

ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន សូមជម្រាបជូនបងប្អូន​ប្រជា​ពលរដ្ឋខ្មែរនៅប្រទេសជប៉ុនថា នៅទីក្រុងតូក្យូ ចំនួនអ្នកឆ្លងវីរុសកូវីដ១៩ បានកើនឡើងខ្ពស់ជាបន្តបន្ទាប់​គួរអោយ​បារម្ភ ហើយអភិបាលក្រុងតូក្យូ និងខេត្តដែលនៅជុំវិញតូក្យូ​ “មិនគួរធ្វើដំណើរ​មកទីក្រុងតូក្យូ បើ​មិនចាំបាច់​និងមិនបន្ទាន់ នៅថ្ងៃសៅរ៍ ទី២៨ និងអាទិត្យ ទី២៩ ខែមីនានេះ​” ។ ជាថ្មីម្តងទៀត ស្ថានទូតសូមអំពាវនាវដល់ពលរដ្ឋខ្មែរនៅប្រទេសជប៉ុន ជាពិសេសបងប្អូនដែលកំពុងស្នាក់នៅទីក្រុងតូក្យូ និងខេត្តទាំង៤ខាងលើ សូមមេត្តាសហការ និងប្រតិបត្តិ តាមការអំពាវនាវរបស់អាជ្ញាធរមានសមត្ថកិច្ចជប៉ុន និងបង្កើនស្មារតីប្រុងប្រយ័ត្ន​ខ្ពស់ជាប់​ជានិច្ច​ពេលធ្វើ​ដំណើ​រ​​ក្នុងករណីចាំបាច់បំផុត ។ សូមថែរក្សាសុខភាព ប្រកាន់ខ្ជាប់នូវអនាម័យល្អ ចៀសវាង​ការជួបជុំគ្នាច្រើន នៅឲ្យឆ្ងាយពីគ្នាពេលជួបគ្នា និងអនុវត្តឲ្យបានខ្ជាប់ខ្ជួននូវការណែនាំ និងវិធានការ​ការពារ​របស់អាជ្ញាធរមានសមត្ថកិច្ចជប៉ុន ។